Interview uf Schwiizerdüütsch

«Das mir Dialekt als Hauptspraach benutzed, aber inere andere Spraach schriibed, isch scho öppis sehr Speziells»

photo of author of the article

Am Samschtig taget s Mundartforum im Kafi Karl z Herisau. D Appezeller Ziitig hät sich mit em Vorstandsmitgliid Anne-Regula Keller über de Dialekt unterhalte und gfrogt, wieso dass es no kei Sektion für d Appezeller Dialekt git und wiso dass es so eini brucht.

abo-iconExklusiv für Abonnenten

S Bruuchtum wie d Stobete wird im Appezellerland höchghalte. Wie gsehts mit em Dialekt us? S Bild stammt vo de Soller-Stobede im Berggasthuus Plattebödeli im Zwanzgzweiezwanzgi.

S Bruuchtum wie d Stobete wird im Appezellerland höchghalte. Wie gsehts mit em Dialekt us? S Bild stammt vo de Soller-Stobede im Berggasthuus Plattebödeli im Zwanzgzweiezwanzgi.

Foti: Archiv

Am Samschtig findet im Kafi Karl und i de Stuelfabrik a de Kasernestroos in Herisau d Generalversammlig vom Mundartforum, em Tachverband vo de Tüütschschwyzer Mundartorganisatione, statt. Nebscht de Versammlig gits e Programm mit Lesigä und Musig im Dialekt und e Füerig vom Werner Alder dur d' Gebüü. D Versammlig fangt am 10-ni aa, s Kulturprogramm am Zwei. E Aameldig isch nöd nötig. D Anne-Regula Keller, Vorstandsmitglied vom Mundartforum, verzellt vorab öppis über Mundart, Dialekt und wieso mer für jede Dialekt e Sektion sött ha.

Weles isch Ihres Lieblingsmundartwort?

Anne-Regula Keller: Das eini Lieblingswort falls mer jetz grad nöd ii, aber mir gfallt Rundumeli für e chliises Chräisli oder Siidebölleli vo de Basler für e härzigs chliises Chind.

Gits i de Mundart au Usdrück, wo Ihne überhaupt nöd gfalled?

Ich han 18 Jahr z Sämpach i der Zentralschwiiz gläbt. Mer seit ja immer, rüüdig seg es Verstärchigswort vo de Lozärner. Aber eigetli isch s Verstärchigswort «huere». Das seit deet fascht jede. Au Fraue, wonichs nöd vonene tänkt hetti. Ich mues gestoo, dass ich das au übernoo han. Ich probiers aber jetz nüme z säge, oder wänn, dänn mit Aafüerigszeiche i der Luft.

Wiso setzed Sie sich so für Mundart ii?

Je länger ich mich mit Mundart befasse, umso unglaublicher find ich die Vielfalt vo däm immaterielle Kultuurguet. Das isch soo öppis verruckts, wo mir do i der Tüütschschwiiz händ. E russischi Linguistin hätt di im Studium gleerti Definition gglaubt, das en Dialekt das isch, wo d Lüüt reded, wänns under sich sind – bis si it Schwiiz ghüürate hät. Das mir Dialekt ali als Hauptspraach benutzed, aber inere andere Spraach schriibed, isch öppis sehr Speziells.

D Anne-Regula Keller isch Vorstandsmitglied vom Mundartforum.

D Anne-Regula Keller isch Vorstandsmitglied vom Mundartforum.

Bild: zvg

Zur Person

D Anne-Regula Keller isch Journalistin, im Unruhestand, wie sie seit – und Vorstandsmitglied vom Mundartforum, Vize-Präsidentin oder wenigschtens im Vorstand vo verschidene Sektione, wo sie zum Teil vor de Uflösig grettet oder aagstoose hät. Die 76-Jöörig hät sich scho mal i irere Studieziit für Dialektologie intressiert und jetzt hätsesi wider packt, wie sie seit. (rak)

Mundart und Dialekt. Wa isch do genau de Underschiid?

Das würd ich au mal gärn eidüütig wüsse. Für mich isch Mundart «die gesprochene Hauptsprache», egal vo welere Region – und Dialäkt dänn ebe di regional Uuspräägig. Offebar gseend das aber nöd ali Wüsseschaftler eso. Di einte säged, es seig s gliich.

In Dütschland gits jo verschiedeni Dialekt und denn no s Hochdüütsch. Gits i de Schwiiz au esonen Überdialekt?

Ali Tüütschschwiizer Mundarte sind alemannischi Dialäkt. Basel und Umgäbig ghört zum Niederalemannische, s Mittelland bis id Voralpetääler ine ghört zum Hochalemannisch und i de Alpe, vor allem im Wallis, isch es Höchschtalemannisch. Das sind zum Biispiil die, wo schniie statt schneie säged. S Appezällere ghört zum Hochalemannisch. Z Tüütschland wird ersch jetzt erchännt, was für en Sprachriichtum die Dialekt wäärid, wänn mers no chönnt. Es hät lang als Puuresprach ggulte. Es isch undänkbar gsi, dass mer i de Wüsseschaft Dialäkt redt. Dass mir i der Schwiiz immer no im Dialäkt redet, hät öppis demit ztue, dass mir kei Zentralregierig händ, wo t Spraach hät chöne befele.

Chame sich uf Mundart besser usdruckä?

Als Düütschschwiizer oder Düütschschwiizeri sicher. Ich merk das immer mee, obwohl Standardspraach mis Handwärk isch. Uf Hochdüütsch mues ich im Hinderchopf immer nu knapp bewusst bitzli überlege, wien ich de Satz aagfange han und was ich jetz für en Fall bruche. Das bruucht sicher au Hirnkapazität.

D Websiite vom Mundartforum isch aber uf Hoochdüütsch. Wieso da?

Will mer suscht jo hetted müese entscheide, i welem Dialäkt dass mer ales hetted wele schriibe. S Mundartforum isch ggründet worde als «Bund Schwyzertütsch». Da händ sich nöd alli mitgmeint gfüült, wel en Huufe «Dütsch», «Düütsch», «Ditsch» oder «Tüütsch», nöd «Tütsch» säged. Drum d Umbenännig zu «Verein Schweizerdeutsch» und schliesslich zum «Mundartforum». Ggründet worde isch de Dachverband mit sälbständige Regionalvereine als Sektione übrigens 1938 als geischtigi Landesverteidigung, wel mer Angscht gha hät, de Hitler chöm und verbüüti s Schwiizertüütsch.

Und für wa bruchts de Verein hüt?

Einersiits isch jo Mundart wider es Theema. Sobald en Pricht über Mundart erschiint, gits unglaublich vill Kommentär. Und wo Mundartveraastaltige bekannt wärdet, sind die waansinnig guet psuecht. A t Mundart-Podie vo der NZZ oder a t «Stubete» im Glarnerland sind scho über 200 Lüüt choo.

Muemmer d Mundart bewaare?

Sprach chamer nöd bewaare. Mer cha sie pfläge, beobachte und Entwicklige dokumentiere. Es wird jo au immer mee Mundart gschribe. Aber das wird nöd sprachbewusst gmacht. Ganz vill, wo Mundart schriibed, meined, es heg gar kei Schriibregle. Gits aber sehr wohl. Am bekanntischte isch d Mundart-Verschriftlichung vom Eugen Dieth. Die Meischte schriibed Mundart, weil mer ebe so chan schriibe, wie eim de Schnabel gwachse isch. Was jo zume grosse Teil au stimmt. Di Wenigschte schriibed Mundart, wel sie sich bewusst sind, was für en grosse Riichtum das isch.

Vo Solothurn über Schaffhuuse bis is Glarnerland gits verschideni Sektione vom Mundartforum. Ez wird gad z Bern wider eini gründet. Gits au eini im Appezellerland?

So vill mir wüssed, leider nöd. Au im Tuurgau und susch i de Nordoschtschwiiz hät sich no niemer organisiert. Mir hoffed, dass sich das glii emaal änderet. Ich bin sicher, dass sich d Lüüt au doo wüürdid defür interessiere, was die vile Mundartorganisatione i irne Veraaschtaltige ales büüted vo Läsige, Poetryslam über Familie- und Ortsnäme zu wüsseschaftliche Fachgebiet und Studie rund um d Mundart.

Wieso gits denn do no kein Verein?

Vilicht isch äifach no niemer uf d Idee choo. Aber gad d Appezäller sind bestimmt wie d Glarner sehr stolz uf iren Dialäkt.

Wa macht denn de Appezellerdialekt uus?

Es isch äifäch seer en äigeschtändige, äigewillige, chli berglerisch-chnorzige Dialäkt i mim Empfinde. Ich känn en aber als Zürcheri nöd eso guet. Ich freue mich aber druuf, en am Samschtig möglichscht vill z ghööre. Ich weiss au nonig, wo d Underschiid vo der  Innerrhoder zur Usserrhoder Mundart liged. Dialäkt sind ja früener scho vo Dorf zu Dorf verschide gsii, aber mit der hüttige Mobilität. Ich bi mit drei Dialäkt uufgwachse und ha gswitscht, und spööter je lang i drüü völig andere Dialäktgebiet gläbt.

Es git Dialekt, wo als schöö und anderi wo als wüescht betrachtet werdet. A wa liit da?

Am Klang und am Tämpo. De Bündner Dialäkt wird zum Biispiel starch mit Ferie verbunde. De Baasler Dialäggt polarisiert, me findt en speziell schön – oder me chan en nöd uusstaa. De Zürcher Dialäkt isch allgemein unbeliebt, aber das hanged dämit zämä, dass halt Züri ä chli z mächtig isch innerhalb vo de Schwiiz.

Entschuldigung a alli Thurgauer; aber de Dialekt wird i de Schwiiz jo scho als de wüeschtischti aaglueged. Wiso?

Ich tänke, es sind die giftige, spitzige, helle «A» won ihr all i der Nordoschtschwiiz händ. Ich liidä mit minere Familiespraach Zürcher Wiiländere, wo linguistisch eigetli au scho derzue ghört, jo au chli drunder. Ich verschricke amigs, wänn ich mini Telefonbeantworteraasaag ghöre, dass ich nach villne Jaar i andere Kantöön eso spitzig rede, won ich doch meine, ich redi Oberländer- oder Allerwältszüritüütsch.

Goht d Mundart ganz allgemein verlore?

Je nördlicher, desto grösser isch au de tüütsch Iifluss, aber das scho immer. I der Nordoschtschwiiz seit me scho lang Butter statt Anke. Spraache verändered sich immer. Es git halt au Iifallstor: Niemer seit Rollstäge oder Kafiniideli, sondern Rollträppe und Kafiräämli. De fiin Summervogel wird zum Schmätterling. Nöi wirt au s Ross zum Pfärd und s Rössli zum Pfärdli.

Hiiwiis:

Weils so schön zum Thema passt, isch da Interview statt wie üblich vo Schwiizerdüütsch uf Hochdüütsch übersetzt, i dere Sprooch abdruckt worde, wos au gfüehrt worde isch. Als Orientierig fürd Rächtschriibig sind d Dieth-Regle agwandt worde: www.züritüütsch.org/zueritueuetsch/schreibweise

Mehr zum Thema
Lenzburg

«Es ist das Zurückkommen der Liedermachenden»: Lebendige Mundart in historischen Mauern

11.03.2026
Vierzehn ausgewählte Künstlerinnen und Künstler präsentieren sich am Mundart-Lieder-Festival Troubadix.
Nachgefragt

«Das Publikum schätzt die Mundart»: Die Appenzeller Sängerin Riana singt auf der Sternenbühne Popsongs im Dialekt

28.06.2025
abo icon
Die Appenzeller Sängerin Riana steht am Samstag auf der zweitgrössten Bühne des Open Airs St.Gallen.

Noch keine Kommentare. Geben Sie die erste Meinung zum Artikel ab.

Für Sie empfohlen

Melden Sie sich an und erhalten Sie hier Ihre individuellen Leseempfehlungen.

Aktuelle Nachrichten